ஷாட்ஸ்

பொது இடங்களில் புகைபிடிக்க தடை விதித்த சட்டத்தை தீவிரமாக செயல்படுத்த வேண்டும் என பாமக தலைவர் அன்புமணி வலியுறுத்தியுள்ளார். புகை பிடிக்காதவர்களை கூட நுரையீரல் புற்றுநோய் தாக்கும் என ஆய்வறிக்கையில் தகவல் தெரிவிக்கப்பட்டுள்ளது. பொது இடங்களில் புகைபிடிப்பவர் விடும் புகையால் அப்பாவி மக்கள், குழந்தைகள், பெண்கள் பாதிக்கப்பட்டு வருகின்றனர் என அவர் கூறினார்.

மேற்கு வங்கத்தில் நாட்டு வெடிகுண்டு வெடித்ததில் 3 பேர் உயிரிழந்தனர். முர்ஷிதாபாத்தில் நடந்த குண்டுவெடிப்பு தொடர்பாக போலீசார் விசாரணை நடத்தி வருகின்றனர்.

ஈரோடு மாவட்டம் மாணிக்கம்பாளையத்தில் தனது இரு குழந்தைகள் மீது பெட்ரோல் ஊற்றி தீ வைத்த தந்தை கைது செய்யப்பட்டுள்ளார். மனைவி, இரு குழந்தைகள் மீது தீ வைத்ததில் 4 வயது மகன் காயமடைந்து மருத்துவமனையில் அனுமதிக்கப்பட்டுள்ளார்.

சென்னையில் ஆபரணத்தங்கத்தின் விலை சவரனுக்கு ரூ.120 உயர்ந்துள்ளது. ஆபரணத்தங்கம் ஒரு கிராம் ரூ.7130-க்கும் சவரன் ரூ.57040-க்கும் விற்பனையாகிறது. சென்னையில் சில்லறை வர்த்தகத்தில் வெள்ளி விலை மாற்றமின்றி ரூ.100-க்கு விற்பனையாகிறது.

திருவண்ணாமலை, திருவண்ணாமலையில் பெஞ்சல் புயல் காரணமாக கடந்த சனிக்கிழமை காலை தொடங்கி மறுநாள் இரவு வரை இடைவிடாமல் பலத்த மழை பெய்தது. இந்த மழையானது, மலையையே அசைக்கும் அளவுக்கு வெளுத்து வாங்கியது. இதனால் அண்ணாமலையார் மலையில் வ.உ.சி.நகர் பகுதிக்கு மேலே உள்ள ராட்சத பாறைகள் திடீரென பயங்கர சத்தத்துடன் உருண்டு கீழ்நோக்கி வந்தன.

அதன் காரணமாக பாறைக்கு கீழே உள்ள மண் பெயர்ந்து அருவிபோல ஆக்ரோஷமாக வ.உ.சி.நகர் வீடுகளை நோக்கி பொலபொலவென சரிந்ததில் 2 வீடுகளுக்குள் புகுந்து அந்த வீடுகளே மண்ணுக்குள் புதைந்தன. அப்போது ஒரு வீட்டில் இருந்தவர்கள் வெளியேறி விட்டனர். மற்றொரு வீடு கண் இமைக்கும் நேரத்தில் மண் சரிவில் சிக்கியது. இதில் ஒரே குடும்பத்தை சேர்ந்த 7 பேர் உயிரிழந்தனர்.

இந்நிலையில், திருவண்ணாமலையில் கார்த்திகை தீபம் ஏற்றப்படும் கொப்பரை வைக்கும் இடத்தில் 400 அடிக்கு மண்சரிவு ஏற்பட்டதாக தகவல் வெளியாகியுள்ளது. அரைமலை பகுதியில் இருந்து சுமார் 600 அடிக்கு கீழ் இந்த சரிவு ஏற்பட்டதாக வனத்துறை அதிகாரிகள் தெரிவித்துள்ளனர்,

திருவண்ணாமலை அண்ணாமலையார் கோவிலில் இந்த ஆண்டிற்காக பரணி தீபம் வரும் 13ம் தேதி அதிகாலையும், மாலையில் 2668 அடி உயர மலை உச்சியில் மகா தீபம் ஏற்றப்பட உள்ளது 

WORST AIRLINES 2024ம் ஆண்டின் உலகின் மோசமான விமான நிறுவனங்களின் பட்டியலில் இடம்பிடித்த இண்டிகோ ஏர்லைன்ஸ் 109 விமான நிறுவனங்கள் கொண்ட பட்டியலில் 4.80 புள்ளிகள் மட்டுமே எடுத்து 103வது இடத்தை பிடித்துள்ளதுநேரம் தவறாமை, வாடிக்கையாளர் சேவை உள்ளிட்டவற்றின் அடிப்படையில் AIRHELP நிறுவனம் இந்தப் பட்டியல் தயாரித்துள்ளது. எனினும் இதில் நம்பகத்தன்மை இல்லை என இண்டிகோ நிறுவனம் தரப்பு இதனை மறுத்துள்ளது.

தமிழ்நாட்டில் அழிந்து வரும் வன உயிரினங்களை பாதுகாக்க நிதி ஒதுக்கீடு செய்து தமிழ்நாடு அரசாணை வெளியீடு செய்துள்ளது. தமிழ்நாட்டில் பாதுகாக்கப்பட்ட பகுதிகளுக்கு வெளியே உள்ள அழிந்து வரும் உயிரினங்களைப் பாதுகாக்க ரூ.5 கோடி நிதி ஒதுக்கீடு செய்யப்பட்டுள்ளது.

நடிகர் விஜய் தன்னம்பிக்கையோடு கட்சி ஆரம்பிக்கவில்லை என்று வி.சி.க. எம்.பி. ரவிக்குமார் விமர்சித்துள்ளார். தன்னம்பிக்கையோடு கட்சி ஆரம்பித்திருந்தால் வலிந்து வலிந்து அழைப்பு விடுக்கும் நிலை ஏற்பட்டிருக்காது.விரிவாக அறிக்கை கொடுத்த பிறகும்கூட திருமாவளவன் பற்றி விஜய் பேசியிருக்கிறார். திருமா பற்றி பேசியதை பார்த்தால் விசிக கூட்டணிக்காகத்தான் விஜய் கட்சி தொடங்கினாரோ என எண்ண தோன்றுகிறது என தெரிவித்தார்.

தமிழ்நாட்டில் பகல் 1 மணிக்குள் 5 மாவட்டங்களில் மழைக்கு வாய்ப்பு உள்ளதாக வானிலை ஆய்வு மையம் தகவல் தெரிவித்துள்ளது. மயிலாடுதுறை, நாகை, திருவாரூர், செங்கல்பட்டு, காஞ்சிபுரம் மாவட்டங்களில் மழைக்கு வாய்ப்பு உள்ளது.

தெற்கு வங்கக்கடலின் மத்திய பதிகளில் காற்றழுத்த தாழ்வுப்பகுதி இன்று உருவாகக்கூடும் என வானிலை ஆய்வு மையம் தெரிவித்துள்ளது. டிச.12-ம் தேதி தென்மேற்கு வங்கக்கடல் பகுதிகளில் இலங்கை – தமிழ்நாடு கடற்கரையை நோக்கி நகரக்கூடும். தமிழ்நாடு, புதுச்சேரியில் டிச.10-ம் தேதி வரை ஒருசில இடங்களில் மிதமான மழை பெய்ய வாய்ப்புள்ளதாக வானிலை மையம் கூறியுள்ளது.

சென்னையில் ஆபரணத்தங்கத்தின் விலையில் இன்று மாற்றமின்றி சவரன் ரூ.56,920-க்கு விற்பனை செய்யப்படுகிறது. ஆபரணத்தங்கம் ஒரு கிராம் ரூ.7,115க்கு விற்பனையாகிறது. சென்னையில் சில்லறை வர்த்தகத்தில் ஒரு கிராம் வெள்ளி விலை ரூ.1 குறைந்து ரூ.100-க்கு விற்கப்படுகிறது.

அமெரிக்க அதிபர் தேர்தலில், டோனல்ட் ட்ரம்ப்புக்காக தொழிலதிபர் எலன் மஸ்க், ரூ.2,120 கோடி செலவு செய்ததாக அதிபர் தேர்தல் பிரசார செலவு தொடர்பாக வெளியிட்டுள்ள செலவின விவரங்களில் தகவல் வெளியாகியுள்ளது. குடியரசுக் கட்சியின் செனட் வேட்பாளர்களுக்கு ஆதரவு தெரிவித்த குழுக்களுக்கும், தேர்தல் பிரசார செயற்பாட்டு நிறுவனங்களுக்கும் பல கோடியை எலன் மஸ்க், அள்ளிக் கொடுத்துள்ளதாக தெரியவந்துள்ளது.

தெலுங்கானாவில் அதிவேகமாக சென்ற கார், ஏரியில் கவிழ்ந்ததில் 5 இளைஞர்கள் உயிரிழந்துள்ளனர். ஐதராபாத்தை சேர்ந்த 6 இளைஞர்கள் நேற்று இரவு காரில் புறப்பட்டு வெளியூர் சென்று கொண்டிருந்தனர். யாதார்திரி புவனகிரி மாவட்டம் ஜலால்பூர் என்ற இடத்தில் கட்டுப்பாட்டை இழந்த கார், ஏரியில் கவிழ்ந்து விபத்து ஏற்பட்டுள்ளது. 6 பேரில் மணிகண்டா என்பவருக்கு மட்டும் நீச்சல் தெரிந்ததால் அவர் ஏரியில் இருந்து வெளியேறி உயிர்தப்பினார்.

இமாச்சலப்பிரதேச மாநிலம் மண்டியில் நள்ளிரவு 2.26 மணிக்கு மிதமான நிலநடுக்கம் ஏற்பட்டுள்ளது. பூமிக்கு அடியில் 5 கிலோ மீட்டர் ஆழத்தில் பதிவான நிலநடுக்கம் ரிக்டர் அளவுகோலில் 3.3-ஆக பதிவாகியுள்ளது.

புதிய சட்டம், மசோதாக்களுக்கு ஒன்றிய அரசு இந்தி, சமஸ்கிருத பெயர்களைச் சூட்டுவதை ஏற்க முடியாது என திராவிடர் கழகம் தலைவர் கி.வீரமணி கண்டனம் தெரிவித்துள்ளார். மேலும் மொழி திணிப்புமூலம் வீண் வம்பை விலைக்கு வாங்கவேண்டாம்! தமிழ்நாடு மட்டுமே எதிர்க்கிறது என்ற ‘பிராந்திய’ சாயத்தைப் பூசவேண்டாம்! ‘‘ஹிந்தி பேசாத மக்கள்மீது ஹிந்தியைத் திணிக்காதீர்கள்! தேசிய மொழி என்று எந்த மொழியும் அரசமைப்புச் சட்டத்தில் இடம்பெறவில்லை! என்றும் அவர் தெரிவித்துள்ளார்.